Euskal Herriak edari bereizgarri bat izatekotan, sagardoa da hori. Sagastiak bertako lur malkartsuetara eta klimara ondo egokitzen dira, eta baserri askotan egiten zen sagardoa. Esan liteke euskal sagardoa Erdi Arotik aurrera hasi zela mundu osoan bidaiatzen, bereziki Ternuara joaten ziren baleazaleen itsasontzietan. Estimu handia zuen, sagarraren bitaminek ekiditen baitzuten marinelak eskorbutoarekin gaixotzea.

Itsasontzietarako zurarekin batera, sagardo-upel ugari joaten ziren Gipuzkoako barrualdetik kostako portuetara. Beraz, sagardoak mende ugari daramatza industria-jarduerei lotuta. Sagardogintza gaur egun ekonomia-jarduera da bere horretan, eta mundu osoko delicatessen dendetan saltzen dute.